بعيدًا على قُربٍ قريبًا على بُعدِ*

   " أنت عارف أنا بحبك قد ايه! بلاش دلع و ثبت دماغك شوية، كفاية إنك مغمض عينك مش راضي تشوفني .. "

أعدلت له رأسه و بدأت بتصفيف شعره الأبيض الامع المنساب على جبينه يكشف شيئا من الصلع في رأسهو بدأت أصفف شاربه الذي كثيرا ما قارنه أصدقائي بشوارب الأبطال في أفلام العمليات الخاصة أو " ألأب الروحي " فهو دائما ما يجلس في غاية الأناقة و الوقار بربطات العنق و الساعات الثمينة ..

   "عارف إن شكلك حلو أوي رغم إنك مش لابس بدلة زي عوايدك .. "

دائما يجلس في ثقة مفرود الظهر ممشوق الجسد رغم عمره الذي كان يفخر أن يضاعفه بأن يزيد عليه عدد الكتب التي قرأها مما ملأته هيبة و حكمة تٌرى في عينيه و خبراته و تعاليمه التي لطالما كان ينقلها لي مذ كنت فتاة صغيرة فقد كان دائما عشقي و فارس أحلامي الرجل الكامل ذي الوجه المشرق المبتسم المهيب رغم طيبة قلبه.

   " اه وشك بيضحك بس ليه مش بتضحك بجد ولا بتتكلم و تهزر معايا و بعدين هو مش أنت بتحب أسرحلك شعرك زي ما دايما بتسرحهولي .. طب ساكت ليه انت أكيد مش زعلان عشان وشك بيضحك أهوه و حلو أوي .. "

   أعشق كيف يبدو وهو مغمض العينين فيه حنان يبعث الحب لمن حوله تشعر به حتى إن لم تراه ، لكن صمته الأن يوجع قلبي أهو نائم ، أهو حزين ، لا لا يبدو حزين أعشق أن أراه ولكن ما بك أشعر بقلبي يعتصر ..

   " طب ! أنا عايزه أوريك الصغير الي شبهك .. بس فتح عينك و شوف شبهك ازاي .. بص حتى هو لابس أبيض في أبيض زايك و ملفوف بيه! ملفوو.. " 

   يتعالى الدق على الباب و أصوات صراخ و نحيب لا أعرف لهم داع ! .. ألا يعلمون أنه نائم أو حزين ! لما كل هذه الضوضاء هم يعلمون جيدا كيف يحب الهدوء خاصة مع صوت الأذان كما هو الأن !!

   -" حرام عليكي يا بنت الي بتعمليه فنفسك و فينا افتحي الباب .. حرام عليكي لازم يخدوه عشان صلاة الظهر أهيه!"

"ملكمش دعوة هو حيقوم لوحده و حياخد ابني الصلاة معاه زي ما قالي في التيليفون.. مش كده يا بابا ؟!"

   -" حرام عليكي تكلمي نفسك يا بنت قطعت قلبي .."

 " حرام عليهم هم عايزين يخدوك مني ليه .. رد عليهم و دافع عني زي كل مرة متسبنيش لوحدي .. كلمهم !! "

  - "ندى أفتحي الباب يا حبيبتي أنا طارق حدخل أنا لوحدي عشان أسلم عليه بس دخليني .."

ما إن فتحت له الباب حتى ضمني اليه و قبل جبيني .. أحبك يا طارق لكن أبي لا يرد.. لما عساه يفعل ذلك

  -" شايفه يا ندى وشه بيضحك إزاي ؟ عارفه ليه ؟ عشان رايح يقابله و عارف انه عامل الي عليه سبيه مبسوط متخليهوش يبقى مضايق عشانك .."

   لا أعرف لما لحظتها انهمرت في البكاء أشعر بيد طارق الحانية تهدئني ولكن قلبي ينسحب من بين ضلوعي 

  -" بوسيه يلا عشان لازم يمشي .."

 قبلته بجائتني بشرته باردة على شفتي كأني ألحظ كل ما به لأول مرة و أرفض الاستيعاب أو الإستسلام .. فلازلت إلى الأن ما أن أدعو له و أقرأ الفاتحة حتى أرى وجهه المضئ يبتسم لي و لكن تتسرب برودة قبلتي له إلى عقلي فأبكي و أرتجف و ما أن يبتسم ف... ابتسم ..

 

                                                                                       علي صــــيام

* اسم القصة شطر من بيت لابن الرومي